En instituziuns da spitex, instituziuns per la vegliadetgna ed instituziuns per persunas cun impediments poi adina puspè dar tensiuns e conflicts tranter las persunas cumpigliadas. La finamira e l’incumbensa dal servetsch da mediaziun è da gidar a chattar a moda nunbirocratica ina soluziun che vegn acceptada da las partidas pertutgadas.

Princips dal servetsch da mediaziun

• Il servetsch da mediaziun agescha a moda independenta ed autonoma ed è politicamain e confessiunalmain neutral.
• Tut las activitads vegnan exequidas a moda confidenziala, discreta, nunbirocratica ed individuala.
• Il servetsch da mediaziun è francà e connectà en il chantun Grischun ed enconuscha las relaziuns regiunalas. Sche pussaivel vegnan resguardadas las cundiziuns linguisticas e culturalas da las partidas.
• Las prestaziuns dal servetsch da mediaziun èn per il solit gratuitas u vegnan remuneradas a basa facultativa. En cas da proceduras da mediaziun extendidas po vegnir pretendida ina contribuziun a las spesas.